Qiqrat

Bishtajoret janë një burim i shkëlqyer i proteinave dhe karbohidrateve, një porcion me qiqra të thata plotëson një të katërtën e marrjes së rekomanduar ditore të fibrave.

Aspektet ushqyese të qiqrave

Konsiderimi i qiqrave si një pjatë shoqëruese, është i pasaktë. Ato kanë një sasi të mirë karbohidratesh, aq sa shpesh konsiderohen si pjata kryesore. Në realitet, përmbajtja e tyre me proteina lejon që ato të vlerësohen në të njëjtën mënyrë si mishi, vezët dhe djathrat. Megjithatë, qiqrat nuk kanë sasi optimale të të gjitha aminoacideve esenciale dhe për këtë arsye kanë një vlerë mesatare biologjike. 
Për të plotësuar profilin e aminoacideve, mjafton t'i shoqërojmë, gjatë të njëjtit vakt ose gjatë gjithë ditës, me ushqime që kompensojnë vlerat që mungojnë, si drithërat. 

Qiqrat kanë një përmbajtje të shkëlqyer fibrash, një pjesë e qiqrave të thata mbulon rreth një të katërtën e sasisë ditore të rekomanduar nga Società Italiana di Nutrizione Umana. Fibrat konsiderohen thelbësore për shëndetin e zorrëve dhe për kontrollin e sheqerit në gjak dhe kolesterolit. Për më tepër, përveç sasisë së reduktuar të yndyrës, qiqrat përmbajnë fitosterole, molekula që kontribuojnë më tej në uljen e nivelit të kolesterolit në gjak.

Ndër vitaminat mbizotërojnë ato të grupit B. Ndërsa ndër mineralet, kalçiumi dhe hekuri janë të pranishëm në sasi të mirë.

Llojet e qiqrave

Në treg, qiqrat mund të gjenden të thara, të ngrira dhe të konservuara. Në ditët tona është i përhapur edhe përdorimi i miellit të qiqrave, ideal për përgatitjen e krepave, omletave dhe qulleve. Nga pikëpamja ushqyese, dallimet janë të papërfillshme, ndërsa porcionet e referencës ndryshojnë për shkak të përmbajtjes së ndryshme të ujit.

Qiqrat e konservuara

Në kuzhinë, për të shkurtuar kohën e gatimit të qiqrave të thata, përveç lënies në ujë, mund të përdorim një tenxhere me presion. 

Ndërsa përpara se t'i konsumojmë të konservuara, duhet të kujtohemi t'i shpëlajmë nën ujë për të hequr lëngun konservues shpesh të pasur me kripë. Lëngu në të cilin zhyten qiqrat e konservuara nuk është i rrezikshëm dhe as i pasur me lëndë joushqyese: në thelb është ujë dhe kripë (ose ndonjëherë sheqer). Thjesht duhen shpëlarë mirë nën ujë të rrjedhshëm dhe qiqrat e konservuara janë gati dhe të pasura me lëndë ushqyese si hekur, karbohidrate, proteina dhe fibra ashtu si qiqrat e thata.

Qiqrat e thata (duhen shpëlarë për të hequr papastërtitë), përpara se të gatuhen, duhen zhytur gjithmonë në ujë në temperaturën e dhomës për rreth 10-12 orë: rregulli që duhet ndjekur është që sa më gjatë të zhyten, aq më mirë, por pa tejkaluar asnjëherë 24 orë. 
Kjo ndodh sepse niseshteja që përmbahet në këto bishtajore thith lagështinë dhe farat duke u ënjtur, rimarrin konsistencën. 
Uji i qiqrave duhet ndërruar dy herë brenda 12 orëve. Pas kësaj, i lajmë mirë nën ujë të rrjedhshëm dhe i kullojmë.
Qiqrat duhet të mbulohen plotësisht me ujë gjatë gatimit në masën 3 litra ujë për çdo 500 gram qiqra të thata. 

Këshillë:

Për ata që nuk janë mësuar të konsumojnë bishtajore (legume), mund të fillojnë gradualisht t'i përfshijnë në dietën e tyre, duke preferuar formën e qëruar për të shmangur shqetësimet e zorrëve. Gjithashtu, përdorimi i sodës së bukës gjatë periudhës së qëndrimit në ujë dhe kohës së gatimit, duket se ndihmon në uljen e këtyre shqetësimeve.